"مش باقى منى"

كنت قد نويت ان اقدم عمل مقالى هذا الشهر ولكنى اردت ان اتشرف بنشر احدث قصائد الشاعر الكبير الاستاذ /جمال بخيت لأن القصيده لمست نفسى ولأنها تستحق ان يقراها الجميع .

*نص القصيده*

مش باقى منى غير شويه ضى فى عنيا انا هديهملك وامشى بصبرى فى الملكوت

يمكن فى نورهم تلمحى خطوة تفرق معاكى بين الحياة والموت

مش باقى منى غير شويه نبض فى عروقى خدى وعيشى وافتحيلى تبوت

افرح بريحة ورد فرعونى وربنا فى عونى اذا دخلت الجنه ولا النار هشتاق الى ضحكتك وقعدتى فى الدار

والقهوة متحوجة من طيبة العطار فى كل يوم الصبح اشرب حليب قبطى وفى النهار والمساء امسك ستار الكعبه لو سبتى

واثبت اذا هربتى اهديكى عمرى وحسى وجوارحى اهديكى جرحى هو اللى باقى فى دنيتى لما خلص فرحى

مش باقى منى غير شويه لحم فى كتافى بلاش يتبعتروا فى البحر بلاش يتحرقوا فى قطار الصعيد فى العيد

بلاش لكلب الصيد تناوليهم خدى اللى بقى من الامل فيهم وابنى لى من عظمهم فى كل حارة مقام وزورينى مرة وحيدة لو كل الفين عام

الم الجراح يتلم .

مش باقى منى غير شوية دم متلوثين بالهم مورين وفيهم سم كانوا زمان شربات والنكته سكرهم شربتهم الخفافيش فى قلب اوكارهم

مش باقى منى غير شويه دم مقدرش اسقيكى مواجعهم وبرضه مقدرش ارميكى وابيعهم يمكن فى مرة تعوزى تطلبينى شهيد هحتاج يوميها الدم يمضى على شهادتى.

مش باقى منى غير شويه قوة فى ارادتى على شويه شعر من خطى حسبى عليهم وانتى بتخطى وانتى فى صبح الدلال بتعطرى شطى .

مش باقى منى غير شويه ضى فى عنيا انا مش عايزهم لو كنت يوم هلمحك وانتى بتوطى فى معركة مفيهاش ولا طيرات ولا جيش وانتى فى طابور العيش بتبوسى ايد الزمن ينولك لقمه من حقك المشروع .

مش باقى منى غير شهقه فى نفس مقطوع بفتحلها سكه ما بين رئه وضلوع ما بين غبار ودموع وانا تحت حجر المقطم فى الدويقه بموت انا والعطش والجوع يأن تحت التراب وانا صوتى مش مسموع يا حلمنا الموجوع من المرور ممنوع مستنى لما يمر موكب سلاطينك

مش باقى منى غير شويه رحمة من طينك على شويه صبر من دينك.

مش باقى منى غير حبة غنا تايهين فى الظلمة مش لاقيين حس الفوعليه ولا صوت مراكبى عفى فوق المعديه ولا صوت بناتى العذارى فى كل صبحيه والغنوة امنيه يا ما نفسى اقابل حبيبى وانا على الزراعيه صوتك وصوتهم غاب وانا تحت حجر المقطم بموت لوحديه.

الليله راحت عيونى تطل على البستان وجناين الرمان رجعتلى توصف عناد الغل والدخان وسحابه سودا تضلل على الغنا الغلبان رجعتلى توصف هبوب الموت على الالوان رجعتلى توصف خيال الذل فى موائد الرحمان .

مش باقى منى غير شويه كفر بشروقك وانا منبع الايمان .

مش باقى منى غير شويه ضى وعنيا مش قادرة تلمحنى فى وحدتى محنى خايف اموت من الخوف والضعف يفضحنى.

السجن عشش فى قلبى وماشى فى شوارعك نفس اللى بعنى وخدعنى بالرخيص بايعك هشيل حمولى انا ولا اشيل حملك ما عدت املك شىء فيكى ولا فيا ولاقيراط ولا بيت ولا نسمه صافيه تلاغى النيل بحريه

مش باقى منى غير شويه حب جرحينى ولا باقى منى غير شويه ضى فى عنيا ..

كنت اردت الا انشر اى عمل ادبى يحس على الحزن منذ احداث غزة ولكن كان للشاعر الكبير /جمال بخيت راى اخر فاجبرنا على ان ننحنى له تقديرا منا على هذه الموهبه والاحساس الراقى

محمد مجدى نور الدين